مندوب دعاية طبية – ميديكال ريب

عندما تريد شركات الادوية تسويق أو ترويج المستحضرات التي تنتجها أو تستوردها أو توزعها، فإنها تقوم بتشغيل مندوب ليقوم بتعريف الأطباء في المستشفيات أو العيادات بمنتجات الشركة، هذة الوظيفة تُسمى “مندوب أو ممثل الدعاية الطبية”، بالإنجليزية ” Medical Representative“، وهذة الوظيفة تُعرف إختصارًا بـ “ميديكال ريب”. غالبًا تشترط شركات الادوية أن يكون مندوب الدعاية الطبية “ميديكال ريب” من خريجي كليات الطب أو الصيدلية أو الطب البيطري أو طب الأسنان أو العلوم.

أهداف المقال والفئات المستهدفة: هذا المقال سوف يفيدك إذا كنت مصري، وخريج جديد (فريش) من كلية الطب البشري أو طب الأسنان أو الطب البيطري أو الصيدلة او كلية العلوم، وترغب في العمل كمندوب دعاية طبية. من خلال هذا المقال سوف تتعرف على جميع الامور المتعلقة بوظيفة الميديكال ريب، سوف تعرف الوصف الوظيفي، طبيعة العمل، المميزات والعيوب، أهم المصطلحات المستعملة في هذة الوظيفية، التدرج الوظيفي، بالإضافة إلى معلومات أخرى قد تفيديك متعلقة بوظيفة مندوب الدعاية الطبية. تنبية: المقال مكتوب في بعض أجزائة باللغة العامية المصرية.

الميديكال ريب – البية الصايع

تقوم شركات الأدوية بتعيين مندوبي الدعاية الطبية، وتدريبهم، بهدف تسويق وبيع منتجاتها، من خلال محاولة إقناع الأطباء في تخصص معين بتحرير منتجات الشركة على وصفاتهم. ببساطة شركة الأدوية، بعد ما تعينك في وظيفة مندوب الدعاية الطبية “ميديكال ريب” هتديك فترة تدريب حوالي إسبوع او أكثر، في خلال هذة الفترة هيعرفوك كل صغيرة وكبيرة عن بعض منتجات الشركة، وبعدها هيطلبوا منك أنك تلف على المستشفيات والعيادات في منطقة معينة وتقابل الأطباء وتكلمهم عن المنتجات اللي أنت أتدربت عليها.

مهمتك إنك تقنع الطبيب أنة يكتب المنتج في روشتات للمرضى، ولما المرضى هيروحوا بالروشتات للصيدليات عشان يصرفوا الدواء، الصيدليات هيعرفوا أن الدواء بتاعك مطلوب، بالتالي الصيدلية هتوفرة من خلال شركات التوزيع أو مندوبي المبيعات في شركتك. أى بيع بيحصل سيان من خلال شركات التوزيع أو بيع مباشر مع الصيدليات أو مخازن الأدوية في منطقة جغرافية معينة بيتم إحتسابة لمندوب هذة المنطقة.

الصورة اللي عند الناس عن مندوب الدعاية الطبية، هى البدلة والعربية، عشان كدة الناس بتكون فاكرة أنة بية،  وفي شغلانة مهمة، إنما الحقيقة إن مندوب الدعاية الطبية أو الميديكال ريب بيتعرض لضغوط نفسية ولمضايقات مختلفة من الجميع، ولازم يكون عندة مهارات بيع و إقناع كتيرة عشان يقدر يبيع المنتج بتاعة ويحقق التارجت المطلوب.

الميديكال ريب – أسئلة شائعة ومتكررة

هل شغلانة الميديكال ريب كويسة؟

الإجابة بتختلف من شخص للتاني، بحسب السمات الشخصية المميزة لكل واحد، ففي واحد تناسبة جدًا الشغلانة، واحد تاني ما يحباهاش ويشوف إنها بتقلل من قيمتة، ولكن في المجمل ناس كثير من الخريجين الجدد بيفضلوا انهم يجربوا الشغلانة وبعدها يقرروا.

هل شغلانة الميديكال ريب سهلة؟

الشغلانة فيها شوية صعوبات، مش أى حد ممكن يستحملها أهمها الضغط النفسي اللى دائما موجود عشان تحقق التارجت أو المستهدف البيعي، بالإضافة إلى أسلوب المعاملة الغير لائق اللي ممكن يتعرض لة المندوب من الناس اللي بيتعامل معاهم في النشأت الطبية المختلفة. بالإضافة إلى ان معظم شركات الادوية الحالية، بإستثناء الشركات متعددة الجنسيات، ما فيهاش نظام واضح للعمل، وبتمشى بحسب أمزجة أصحاب الشركة أو المديرين. فعلاقتك بمديرك او الإدارة هى اللى هتحدد مسارك ومستقبلك، وبشكل عام تعتبر المصالح هى كلمة السر في هذة المنظومة، بمعنى لو انت معايا وبتنفذ كلامي ، فإنت كفاءة وحبيبي، إنما غير كدة هأقرفك وأطلع عينك وشوية وهامشيك وأجيب غيرك.

هل ممكن البنات تشتغل ميديكال ريب؟

أكيد ممكن البنات تشتغل الشغلانة دي، ولكن أنصحك تبدأ في شركة متعددة الجنسيات، او شركة سمعتها كويسة عشان تقليلي المضايقات اللى هتتعرضي ليها، ومن الأخر عشان تدخلي شركة محترمة في الوقت الحالي، خصوصًا لو انتي خريجة جديدة هيكون في صعوبة، يا إما حضرتك معاكي واسطة أو خريجة من جامعة أجنبية والسي في بتاعك فية مميزات مش موجودة في الألوف اللي بتقدم، يا إما تبدأي في شركة متوسطة أو تعبانة وتستحملي الأرف، والمضايقات لحد ما تكتسبي خبرة في الشغلانة، تقدري بعدها تقدمي (تشفتي) في شركة محترمة شوية.

هل ممكن أشتغل ميديكال ريب أثناء الدراسة؟

طبعًا ممكن تشتغل ميديكال ريب أثناء الدراسة، بس هتكون بدوام جزئي، وفي الغالب لازم يكون معاك واسطة أو معرفة عشان تشغلك في الشركة.

هل الشركة هتديني عربية لما اشتغل ميديكال ريب؟

بعض الشركات بتشترط ان اللى يقدم على وظيفة الميديكال ريب يكون معاة العربية الخاصة بتاعتة، والشركة بتديك بدل للبنزين او خلافة، ودي غالبًا بتكون شركات محلية او ناشئة. وبعض الشركات بتديك فلوس تشتري عربية لكن بعض فترة من الشغل ( ممكن بعد ثلاثة شهور او بعد تحقيق أول تارجت)، عشان يتأكدوا انك بتشتغل زي ما هما عايزين.

هل في شرط جزائي لو سيبت الشغل؟

بعض الشركات، ممكن تقول لك تمضي على شرط جزائي أو وصل أمانة بمبلغ معين، تدفعة لو سيبت الشركة قبل فترة معين، مثلاً تدفع 10 تلاف جنية لو سيبت الشركة قبل مرور سنة من تعينيك، و التبرير أنهم قاموا بتدريبك وتعليمك الشغل وصرفوا عليك، ولكن نصيحيتي لك بلاش تمضي على أى شرط جزائي و أى مكان هيطلب منك كدة في الغالب هو مكان هتتعب فية جداً ، بالإضافة إلى ان دة مش قانوني.

هل شغلانة الميديكال ريب حرام؟

الشغلانة نفسها طبعًا مش حرام، ولكن في بعض الأحيان ممكن تضطر أنك تعمل حاجات او تقول حاجات تتنافي مع الأعراف العامة أو الأصول المعروفة، يعني مثلًا ممكن ما تقولش الحقيقة كاملة، و بدون شك أكيد هتحتاج تجامل ناس كثير، في ناس هتشوف المجاملة دي (رشوة أو تعريض)، وفي ناس تانية هتشوفها عادى. موضوع الحلال والحرام موضوع نسبي، وحضرتك اللي تقدر تحددة وتقرر بعد ما تمارس الشغلانة بنفسك. وبشكل عام أنصحك تشوف مصلحتك وتحاول على أد ما تقدر تتجنب الحاجات اللي مش سليمة، ولو ما قدرتش إستحمل شوية لحد ما تروح لمكان محترم يكون ماشي بما يرضى اللة. بس حاب أعرف حضرتك ان بشكل عام الدنيا بايظة للأسف.

هل الحرق حرام؟

الحرق ، هو أنك كمندوب تخلي الصنف بدل ما خصمة 20 تخلية مثلاً 40 ، عشان تغري المخزن أو الصيدلية أنها تشترية، وهو أسلوب معظم المناديب بتعملة عشان تحقق التارجت بتاعها، والشركة بالرغم من انها بتقول ممنوع الحرق، إلا ان الأدراة في الشركة بتكون عارفة أن المناديب بتحرق بس بيطنشوا عشان البيع . الشركات المحترمة لو أتأكدوا أن المندوب بيحرق البضاعة (يعني بيزود خصم المنتج) هيرفدوة. بالنسبة للحرام والحلال، الموضوع نسبي و بيختلف من شخص للتاني، بس على أد ما تقدر بلاش تضر أى حد وانت بتحرق.

مصطلحات مرتبطة بمهنة الميديكال ريب

  • تران_نينج: وهو تعريب للكلمة الإنجليزية ” Training”، وتعني تدريب أو تأهيل، وهى فترة تبدأ مباشرة بعد التعيين، أو تلي إطلاق منتج جديد للشركة، وفيها يتم تدريب مندوبي الدعاية ” الميديكال ريب” على مهارات البيع والإقناع وتعريفهم بنقاط القوة والضعف في كل منتج، ومقارنة المنتج مع المنتجات المنافسة، ببساطة تعرف الميديكال ريب عن كل التفاصيل المتعلقة بتسويق أو ترويج المنتج.
  • إريا: وهو تعريب للكلمة الإنجليزية “Area”، وتعنى المنطقة أو المحيط المكاني الذي يعمل فية المندوب. يعنى المندوب بعد ما يتلقى التدريب بتاعة، الشركة بعدها بتطلب منة أنة يزور المنشأت الطبية المستهدفة (المستشفيات، العيادات، الصيدليات) في منطقة جغرافية معينة مثلًا مدينة نصر، مصر الجديدة ، المعادى. ويقوم بعملة في تسويق و ترويج بيع منتجات الشركة و متابعة و مراقبة عمليات البيع في هذة المنطقة، وإمداد الشركة بالتقارير الهامة المتعلقة بمنتجاتها في هذة المنطقة. في الغالب بتعرف الإريا اللي هتشتغل فيها أثناء الإنترفيو (مقابلة العمل الاولية).
  • لاين (Line): كل شركة بتكون عندها عدد كبير من المنتجات، وبتكون مقسمة المنتجات بتاعتها غالبًا حسب الإستعمال، على سبيل المثال المكملات الغذائية، أدوية القلب والأوعية الدموية، أدوية الجهاز العصبي إلى اخرة. كل مجموعة من المنتجات (غالبًا) في نفس الفئة العلاجية، تُسمى لاين. يعنى كلمة لاين بتشير إلى مجموعة المنتجات أو المستحضرات اللى المندوب هيشتغل عليها، ودى تعتبر أهم حاجة المفروض تسأل عليها قبل ما تشتغل ميديكال ريب، لأن الـ لاين (مجموعة المنتجات) اللي هتشتغل عليها هى اللى هتحدد قدرتك على تحقيق التارجت، وسهولة الشغل او صعوبتة إلى اخرة، فعلى سبيل المثال لو هتشتغل بيع ودعاية على منتج أو منتجات معروفة هيكون سهل أنك تحقق التارجت، اما لو هتشتغل على لاين جديد أو منتجات غير معروفة، هتضطر تشتغل كتير وممكن ما تعرفش تحقق التارجت.
  • بروسبيكشن (Prospection): هى عملية إستشكاف للمنطقة التي سوف تقوم فيها بترويج وبيع منتجات الشركة، حيث تقوم بالتعرف على أماكن العيادات أو المنشأت الطبية المستهدفة، والصيدليات وغيرها من المعلومات التي سوف تفيدك، وتُسهل عليك عملية البيع والتسويق في هذة المنطقة. في الغالب عملية الإستكشاف او التنقيب بتكون في الفترة التي تلي التدريب مباشرةً او إذا تم نقلك إلى منطقة أخرى. وفي أغلب الاحيان زميلك القديم او الشركة أثناء التدريب هيعرفوك الإريا بتاعتك كويس.
  • التارجت (Target): هو الرقم المستهدف لعدد العبوات المطلوب بيعها في فترة زمنية معينة، على سبيل المثال هيكون مطلوب منك أنك تحقق مبيعات في كل شهر مثًلا 1000 عبوة من المنتج اللى أنت شغال علية او تبيع مثلًا بـ 50 ألف جنية كل شهر من منتج معين أو من مجموعة منتجات . التارجت غالبًأ بيتم إحتسابة كل ثلاثة أشهر، وبعض الشركات بتحسبة كل 6 أشهر. وفي الغالب لو ما حققتش التارجت هيطلبوا منك أنك تستقيل، لكن لو حققتة هتأخذ حوافز أو مكافأة إسمها إنسينتيف “Incentive”. ملحوظة: مرتب الميديكال ريب ثابت سيان حقق التارجت أو لم يحقق، ومبيعات كل ميديكال ريب بتظهر في حاجة إسمها “شيت البيع”، بتبعتة شركات التوزيع عن كل منطقة.
  • الإنسينتيف (Incentive): هو مبلغ مبالي مقابل تحقيق المستهدف البيعي، وفي الغالب المندوب بيقبض الإنسينتف كل ثلاث أشهر، وفي بعض الشركات كل 6 شهور بحسب كل شركة. و في معظم الاحيان بتم صرف الحافز (الإنسينتف)، إذا ما تم تحقيق 90% من المستهدف البيعي.
  • أكشن بلان (Action Plan): لو حصل إنك ما حققتش التارجت المطلوب، ففي الغالب هطلب منك مديريك تحقيق التارجت في فترة زمنية معينة، ولو ما حصلش هيطلب منك أنك تقدم إستقالتك و دى حاجة إسما (أكشن بلان)، وهنا الشركات بتختلف عن بعض والمديرين بيختلفوا عن بعض.
  • دوام كامل أو دوام جزئي (Full time, Part time): وظيقة مندوب الدعاية الطبية، يمكن ان تكون بدوام كامل، يعني المندوب بيشتغل فترتين، فترة صباحية، وفيها بيلف غالبًا على المستشفيات و بيزور الدكاترة في الأقسام المستهدفة في العيادات، وفترة اخرى مسائية وفيها بيزور المندوب العيادات لتعريف الأطباء بالمنتج والمتابعة، والصيدليات لمتابعة البيع وحركة الصنف.
  • صباحي أو مسائي (AM – PM): هى طريقة أخرى للتعبير عن مواعيد العمل، ففي أثناء المقابلة الاولية يعرف الميديكال ريب مواعيد عملة إذا كانت صباحية أو مسائية
  • الدكتور بيعقد صفقات (بـ يديل – يعني يعمل Deal): الأطباء انواع، نوع بيشتغل فعلًا لمصلحة المريض، ويهمة ان الدواء اللى بيكتبة في روشتاتة يكون فعال ومناسب لحالة المريض اللإقتصادية، وفي نوع تاني بيطلب إمتيازات من الشركة عشان يكتب المنتج في الروشتة بتاعتة. ودة طبعًا المندوب بيعرفة إما من الصيدلية او من إستقبال العيادة أو مباشرة من الطبيب. وطبعًا الشركة بتكون معرفاك الإمتيازات اللى ممكن تقدمها للطبيب، وطبعًا الإمتيازات بتختلف من طبيب إلى أخر بحسب تصنيف الطبيب. كل التفاصيل دي بتعرفها في فترة التدريب.
  • الكول (Call): هو الكلام اللى بتقولة للدكتور في الزيارة عشان تعرفة بالمنتج وتقنع أنة يكتبة في الروشتات بتاعتة.
  • جي بي إس (GPS): هو نظام لتحديد المواقع، بتستخدمة شركات الادوية لمراقبة مندوب الدعاية( الميديكال ريب)، فمثلًا الشركة بتطلب من المندوب أنة يبعت اللايف لوكاشن بتاعة على منصة خاصة بالشركة، في كل مرة يزور فيها عيادة او مستشفى. في شركات عندها نظام المراقبة باستعمال الجي بي إس وفي شركات تانية ما عندهاش، ولكنها بتستخدم نظام أخر لمتابعة إلتزام المندوب بيعتمد على مدير المنطقة.
  • دوبل فيزيت (Double visit) او الزيارة المزدوجة: هى طريقة اخرى بتستخدمها بعض الشركات لمراقبة إلتزام الميديكال ريب بخطة الشغل، وفيها بينزل مدير المنطقة مع المندوب لزيارة اماكن معينة في الإريا (عيادات معينة ، صيدليات معينة)، ومن خلال هذة الزيارة المزدوجة، يستطيع المدير إستنتاج معلومات مهمة عن إلتزام المندوب و متابعتة للبيع في منطقتة.
  • الحرق: لما الميديكال ريب، بيتزنق وما يعرفش يحقق التارجت، بيلجأ لأسلوب أسمة (الحرق)، وهو طريقة لزيادة المبيعات عن طريق زيادة خصم المنتج، وغالبًا المندوب نفسة هو اللى بيدفع فرق الخصم من جيبة. مثلاً المنتج خصمة الرسمي في الشركة 20%، فالمندوب عشان يحفز الصيدلية أو المخزن أنة يشترى الصنف، يوصل الخصم لـ 40% ويدفع هو الفرق من معاة هو أسلوب بترفضة كل شركات الادوية.
  • الترقيات: مندوب الدعاية لما يترقى بيبقي سوبر فيزور، وبعدها بيبقى ديستريكت مانجر، وبعدها إريا مانجر، وبعدها لاين مانجر.

كلمنا لو عندك سؤال أو إضافة: لو عندك سؤال او لو حابب تضيف معلومة او تصصح حاجة وردت في هذة الصفحة، فمن فضلك كلمنا من خلال نموذج إسأل واستشير من الرابط هنا، تنبية: لا يمكننا ان نساعدك في توفير فرصة عمل أو التوصية أو التقديم على وظيفة الميديكال ريب.

هدفنا هو تزويدك بالمعلومات الأكثر صلة والأكثر حداثة. ومع ذلك، لا يمكننا ضمان أن تتضمن هذه المقالة جميع المعلومات التى يجب أن تعرفها. حقوق النشر: “جميع الحقوق محفوظة © فارماسيا” – تواصل معنا عبر نموذج التواصل. التحديث و الإضافة والتعديل: تواصل معنا، إذا كنت تعرف أي معلومات، تحديثات، إضافات أو تعديلات يمكن إضافتها إلى هذة الصفحة عبر نموذج التواصل أو اكتب تعليق في أسفل الصفحة. العلامات المرجعية: #المهن_الطبية